رسالة الى الشهيد بنيان

«حديث الملائكة،

ورسالتي للسما»

قلتلو آخ يا أمي قديش بردان…

يا رب وقف الثلج..

قال:.. لا يا أمي لا تقولي هيك, الثلج سقانا ميّ نظيفة من السّما بعد ما أهل الأرض سَمّموا المَي عنّا…

ربنا ما بيبعث إلا الخير

نحنا يلي ما قَدّرنا نعمة ربنا..

انتبهي لدعواتك يا أمي…

_ قلي أمانة لا تكبّي ولا لَقمة خبز… أجمعيهم ويبسيهم.. بس روح لعندك رح اعملك أطيب الأكلات منهم..؟!

_ قلي أمي سكري، رح يخلص شحن موبايلي. كهربا ما عنا.. كل يوم منشغل المولدة ربع ساعة لنشحن موبايلاتنا….!؟

كنت أستغرب…

واليوم…

«رسالتي لنجوم السما». بنيان

………………………

بدي قلك يا أمي.. اسمعني

كل حصارك بالكندي إنت ورفقاتك هلق عم نعيشها نحن أهل الأرض ظلمناكم. نعم ظلمناكم..

….كل يوم بتذكر كلماتك…

أمي.. كهربا كل خمس ساعات نصف ساعة نشحن موبايلاتنا.

وغاز وتدفئة ما في وشح الخبز.. وحطب قطعوا شجرة السنديان عنا ليدفوا متل ما انتو أبواب المشفى المكسرة كانت حطب لتدفوا.. والشجرات يلي حرقوهم.. وغلاء وفساد ووحشية.

امي سلملي لرفيقك المسيحي من الحسكة يلي خبّى رغيف الخبز.. بيوم الثلج والبَرد.. وقدملك بشهر الصيام لتفطر مع رفقاتك…

الفرق أنتم جمعكم الحب، والقيم والاخلاق،

ونحنا فرقنا الكره والحقد والأنانية…

هلق.. عنا بيجي الضيف من قلو جيب رغيف خبزك معك…

لا تقلق

أمي أنا مثل ما عاهدتك رح ابقى،

ما بعرف اذا عم تقرأ كلماتي…

انتوا خلصتوا.. وارتحتوا…

ونحنا بعدنا ناطرين الخلاص من عند الله… وصابرين..

البشرية مجنونة من بعدكم…

والقتل والذبح. صار بكل الدني..

أمي رغم كل شي بقول:

انتوا تحملتوا أكثر بكثير منا. يمكن لأنكم أنبياء. وصبرتم وما حكيتم شي ويلي شفتوه غير ما شفنا. وما صدقنا..

نحنا بشر.. ما عنا قدرة نتحمل..

خجلاني منّك. لا تفكرني ضعفت. لاااا يا أمي.. بس عم اتذكر كل كلماتك هلق، كانت رسائل وما انتبهت..، الحكي بيني وبينك، لا تخبر رفقاتك،

خليه سّر بيّنا…

شو قولك مطولين لنخلص؟!

خبرني أرجوك،

اعفوا واشفعوا إلنا….

أمك يا بنيان…..