الزعيم الشهيد
مصطفى خروبي
سعادة وسع هالكون طول وعرض
فكرو فتح بالشرق طاقة نور
سلاحو حمل تا يحمي الأرض
من سايكس بيكو ومن وعد بلفور
الحاكم بوقتا كان استعمار
فرنسي، بريطاني والغزو جبّار
سعادة المقاوم كان هوّي الردّ
والنّار ما بتنردّ إلا بنار
حرّك مشاعرنا
وطلعت بشايرنا
زوابع وقوميين
والبوصلة فلسطين
للندّ كنّا الندّ
لمّا الوطيس اشتدّ
سعادة المقاوم كان هوّي الردّ…
كنّا النسور الأول
وسيف النصر حدّو
تشرقط وتغضب دول
ضدّنا وضدّو
تا يحفروا قبرا
لسورية الكبرى
اغتالو الزعيم بليْل
وفاق الغضب والويل
وكانت مصيبتنا
الخونة بدولتنا
عالخاين اللي تآمر علينا
بالأردن بعمّان ردّينا
والظلم ما بيجوز
وتاريخنا بتمّوز
شاهد ع هالسّلطة
الوقعت بهالورطة
ودمّ الزعيم يهزّ
العالم بوقفة عزّ
المجد انتفض باليمّ
سعادة كتب بالدم
تاريخ أمتنا
وشموخ نهضتنا
ويقول للجلاد
بعزّ وصبر وعناد
من هون رح بتفلّ
وسورية بتضلّ
ما تفرح بقتلي
بيخلق ألف متلي
يصرخ سعاده بصوت
مش خايف من الموت
عالرمل ببيروت
يطّمنوا رفاقي
جسمي أنا بيموت
بس الحزب باقي