صرت البعيد !
} جهاد أيوب
جاي وحامل معك هدية العيد
يا ريتك سألت عني قبل ما صرت بعيد
شو نفع طلتك اليوم
وانت من سنين خارج النوم
وحابس الحقيقة بميزانك البعيد …
جاي تكسر باب الجليد
ثلجك صار بقلبي حديد
روح الله يسامحك
فتش ع مدينة تا تعرفك
تتشرّد بطرقاتها وما تلتقي بحبيب…
شمسك من زمان غابت
لبست منام الخوف وما عادت
تدحرجت مع ذكرياتك على المجهول
وتجمّدت دمعاتك ع خط العرض والطول
بيكفي كذب بيمرق بنص الحكي
بدعساته بهدم المملكة وما بشوف البكي
وبِفخخ النهدات
وبِضيع الأمل مع الغمزات
وبِفزع الخيل
وبِمحي الكلمات
وبطرز غيوم العمر بالنهدات …
مفكر أنا ع درج جمراتك بسكب حكايات
وبسامحك وبضحك وبتقبل منك الوردات
روح
روح وما تدق باب الدار
دربك ضاع من تاريخك المنهار…
روح
روح مش ناقصنا شجر مكسور
وأغصان صوتها داخل التنور …
روح
غضبك بركان خامد ما بثور
واضح على حالك عم بتدور…
روح
حدي رح تشقى
وتتلعثم وما تغفى
روح
وحدي أنا ببقى
من الزهر عطره
ومن الشجر بخور
مسكين
ما بتعرف الزمن دوار
ما عاد يرحم
بسمة فرح غصة بالقلب وأسرار
روح
انتهى المشوار
وما بقى لك مسكن بهدار …
