العزّ وقفة أشرف الوقفات

} الشاعر عادل خداج

كلما أنا ليكي بجي يا ضهور

بشعر بموقف عزّ مش عادي

بحسّ بسماكي الشمس عم بتدور

ع وهج فكر بهالأرض بادي

والنور فيكي كشّح الديجور

بأشرف عقيدة صانت بلادي

ومن قبل ما بركان شعري يفور

وعلّي الجبين بصرّخ ونادي

وبقول تحيا سوريا وبثور

ويحيا الزعيم ونهضة سعاده

***

وبتماني تموّز انحنو التلّات

بمؤامرة من وحوش رجعيّين

استشهد سعاده والبطل ما مات

خالد خلود الدهر ما بيلين

وتا يحيّدو القائد عن الساحات

بالعتم تنفّذ حكم مأجورين

والعزّ وقفة أشرف الوقفات

ما اهتزّ لرصاصات غدّارين

وشوفو الفرق بين البشر بالذات

بين فكر ثوري وخسّة شياطين

استشهد وبجيابو بضع ليرات

والباع دمّو قابض ملايين

***

رجعنا رجعنا لقلب موقعنا

وعن سوريا الأحرار ما ضعنا

وقعو أعادي شعبنا الأنذال

ونحن جبال المجد ما وقعنا

وسيف القدس عا روسهن زلزال

ودم  المقاوم ظلّ مرجعنا

ووقفة سناء محيدلي ودلال

نسينا وجعنا الكان يوجعنا

بوعيي السياسي عشت فاضي البال

ما زال سورّيا سند للشرق

ونحن بني صهيون ركّعنا

***

الأمين أسعد يا فكر ناقي

مرّ الزمان وما بيتغيّر

لحزبو لزعيمو عالعهد باقي

خطّو الوفا بالسرّ والمجهر

تجوهر بوقفاتو بفكر راقي

برتبة نسور الزوبعة تجذّر

وعمل السياسي نهج أخلاقي

وعالعمر ما بيتغّير الجوهر